Тараптар 2017-2018 ж.ж. кезеңінде Қазақстаннан Қытайға табиғи газ жеткізудің мүмкіндігін талқылап, 5 миллиард текшеметрге дейінгі көлемде қазақстандық газды экспортқа сату шартына қол қоюға келісті. Мұнай-газ компанияларының басшылары өзара түсіністік туралы меморандумға қол қойды. Құжат өнімді жеткізу көлемдерін, бағасын және сапасын, сондай-ақ қытай тарапының газды қабылдап алу орны – «Қорғас» шекара пункті деп айқындалды.
«ҚазМұнайГаз» ҰК АҚ Басқармасының Төрағасы Сауат Мыңбаев Астанада қол қойылған меморандум, Қазақстан мен Қытайдың екіжақты өзара тиімді ынтымақтастығын одан әрі нығайтуға мықты негіз болып табылады деп атап өтті.
«ҚазТрансГаз» АҚ директорлар Кеңесінің төрағасы Қайрат Шәріпбаевтың пікірінше, қазақстандық газды тасымалдаудың транзиттік және экспорттық бағыттарын әртараптандыру, сондай-ақ көгілдір отын экспортының көлемін ұлғайту - мемлекет басшысы белгілеген стратегиялық міндет. Қытайға қазақстандық газды экспорттау туралы уағдаластыққа қол жеткізуге экспортқа бағытталған тасымал жүйесін қалыптастыру жөніндегі өте ауқымды және күрделі жұмыстар арқылы қол жетті: «Бейнеу-Бозой-Шымкент» газ құбыры салынды, «Қазақстан-Қытай» магистральдық газ құбырының үшінші тармағын пайдалануға енгізу және жоғары технологиялық «Бозой», «Қараөзек» компрессорлық станциялары мен «Ақыртөбе» сығымдау компрессорлық станциясының салынуы.
Кездесуде аталып өтілгендей, қазақстандық газды Қытайға жеткізу екіжақты өзара тиімді қарым-қатынастарға, сондай-ақ Еуразия елдері арасында инфрақұрылым құруға және сауда, көліктік байланыстарды жолға қоюға бағытталған «бір белдеу, бір жол» бастамасы шеңберінде ынтымақтастық қарым-қатынастарын бірлесіп қамтамасыз етуге және ілгерілетуге ықпал ететін болады.
«ҚазТрансГаз" АҚ – Қазақстандағы газ және газбен жабдықтау саласындағы ұлттық оператор. «ҚазТрансГаз» АҚ компаниялар тобының құрамына газ өндіретін, тасымалдайтын және өткізетін және оның өнімдерін қайта өңдейтін кәсіпорындар мен ұйымдар кіреді.
"ҚазТрансГаз" АҚ Баспасөз қызметі Тел: +7(7172)-55 23 16
